Ərdoğanın nüfuzundan istifadə etdik | Blinken Türkiyə səfəri barədə hər şeyi danışdı

“HƏMAS-ı danışıqlara razı salmaq üçün Türkiyə Prezidenti Rəcəb Tayyib Ərdoğana müraciət etdik”.

Bu sözləri ABŞ Dövlət katibi Entoni Blinken jurnalistlər üçün keçirilən mətbuat konfransı zamanı bildirib.

“Düşünürəm ki, atəşkəsi əldə etməyimizə səbəb bizim diplomatiyamızdır. Zənnimcə, HƏMAS-ı təcrid etməyə nail olduq. Onları bizimlə masaya oturmağa vadar etdik. Son həftələrdə HƏMAS danışıqlardan birində imtina cavabını verəndə mən Qətərdəki dostlarımızın yanına getdim. Dedim ki, HƏMAS-a artıq onların Qətərdə yerləşən siyasi mərkəzlərində xoş qarşılanmadıqlarını söyləməyin vaxtı gəlib. Qətərlilərin də istədiyi məhz bu idi.

Ötən həftələrdə Türkiyə Prezidenti R.T.Ərdoğan da daxil olmaqla digər rəsmilərlə görüşdük. Biz HƏMAS-ı yenidən masaya oturtmaq üçün Türkiyə liderinin regionda söz sahibi olmağından və nüfuzundan istifadə edərək razılaşma əldə etməyə çalışdıq və o buna da nail oldu. Biz bunu birlikdə bacardıq”, – deyə Entoni Blinken diqqətə çatdırıb.

Qeyd edək ki, uzun müddətdir davam edən danışıqlardan sonra HƏMAS-la İsrail arasında Qəzzada atəşkəs elan olunub, o cümlədən əsir və girovların dəyişdirilməsinə dair razılıq da imzalanıb.