Ermənistan Baş nazirinin paylaşımı narazılığa səbəb oldu

Ermənistanın Baş naziri Nikol Paşinyanın şəxsi həyatı ilə bağlı paylaşdığı video yerli medianın manşetini zəbt edib.

O özünün feysbuk səhifəsində “Anna Çindən gəlib və o kabab istədi” başlıqlı görüntülər yerləşdirib. 

Paşinyanın kabab qonaqlığı sosial şəbəkələrin erməni seqmentində birmənalı qarşılanmayıb. Bunu Ermənistanın Baş nazirinin paylaşımına gələn şərhlərdən də görmək mümkündür.

Sosial şəbəkə izləyicilərinin çoxu yazır ki, ölkədə iqtisadi vəziyyət ağırdır, əhalinin əhəmiyyətli hissəsi yoxsulluq içində yaşayır, işsizlik artır, bir çox ailələr gündəlik ərzaq ehtiyaclarını belə ödəyə bilmir. Belə bir şəraitdə Baş nazirin kabab bişirib paylaşması xalqla məsafə yaratmaq deməkdir.

Məsələn vətəndaşlardan biri “Ermənistanda uşaqlar ac yatır, nənələr yemək tapmır. Sən hansı ağılla manqal hazırlayırsan?! Ayıb olsun” sözləri ilə Paşinyanı sərt tənqid edib.

Digər izləyicisi isə iradını bu cür ifadə edib: “Cənab Baş nazir, Annaya nə yemək lazım olduğunu göstərməyə ehtiyac yoxdur. Bu onun gündəlik həyat formasıdır. Amma insan var ki, yeməyə bir tikə çörəyi yoxdur. Heç olmasa əlillərin pensiyasını artırın”.