Ermənistan Rusiya ilə yenidən əməkdaşlığa başlaya bilər? | Politoloqdan qalmaqallı sözlər

Nikol Paşinyanın Ermənistanın Rusiya ilə əməkdaşlığa qayıtması qeyri-mümkündür. Çünki hamı başa düşür ki, N.Paşinyan bunu niyə və nəyə görə edir.

Məlum oldu ki, N.Paşinyan nə Fransaya, nə də ABŞ-yə lazımdır. Amma o, artıq yeni bakirəliyini bir daha Rusiyaya sata bilməyəcək.

Hazırda Ermənistan üçün ən mühüm problem KTMT-dən necə çıxmaq və Avrasiya İqtisadi İttifaqında qalmaqda davam etməkdir. Bu, utopiyadır. N.Paşinyan Ermənistanı təcridə və xalqın kütləvi surətdə köçməsinə, dövlətçiliyin ləğvinə aparır.

Bu sözləri rusiyalı politoloq Modest Kolerov “Hraparak”a müsahibəsində Nikol Paşinyanın komandasına Rusiya ilə münasibətləri bərpa etməyi tapşırmasını şərh edərkən deyib.

O bildirib ki, N.Paşinyan eqoist və rusofob olduğu üçün bunu bilərəkdən edir:

“N.Paşinyanın Rusiya ilə döyüşməsinin ermənilər üçün ağır humanitar nəticələrə səbəb olacağı onun vecinə deyil”.

M.Kolerovun sözlərinə görə, N.Paşinyanın əsas ümidi Fransa idi, amma Emmanuel Makron tezliklə gedəcək və onun bütün layihələri sıfırlanacaq:

“Avropa İttifaqı üçün Ermənistan çox uzaqda, dünyanın sonundadır. Bundan əlavə, Avropa Birliyi Türkiyə, İran və Gürcüstana qarşı soyuq müharibə aparır. Ona görə də Aİ Ermənistana fiziki kömək edə bilməz.

Hesab edirəm ki, Aİ-nin ermənilər üçün edə biləcəyi maksimum şey ukraynalılarla olduğu kimi, erməniləri Ermənistandan çıxarmaq ola bilər. Avropa Birliyi artıq qaçqın ukraynalılara dəstəyi dayandırır. Əvəzində Ermənistandan erməniləri qəbul edə bilər. Amma bu, sadəcə olaraq Ermənistanı boşaldacaq və N.Paşinyan Parisdə fəlsəfə professoru olacaq”.