Əsədin ən böyük səhvi idi ki… | İran etdiklərini necə ört-basdır edir?

Heç kimə sirr deyil ki, Suriyada Əsədin devrilməsi həm də İranın böyük məğlubiyyətidir və hazırda bu məğlubiyyət İran xalqında ölkə rəhbərliyinə qarşı inamı bir qədər də zəiflədib.

Məhz bu səbəbdən də İranın rəsmi mediası bəyanat yayaraq İranın Əsədi niyə dəstəkləmədiyini, o cümlədən niyə əsgər göndərmədiyini açıqlamağa çalışaraq zərbə almış nüfuzunu təbliğatla qorumağa çalışır.

Bəyanatda İŞİD-in güclənməsi və təhlükəsizliyin pisləşməsi ilə Suriya hökumətinin rəsmi olaraq kömək üçün İrana müraciət etdiyi xatırladılıb:

“Zaman keçdikcə terrorçular genetik mutasiya yaşadılar, zorakılıqdan əl çəkdilər və diplomatik mövqe tutdular. Suriya xalqı artıq terrorçularla mübarizədə Suriya Ordusuna dəstək vermədi. Suriya Ordusunun da müxtəlif səbəblərdən, o cümlədən dini və iqtisadi zəiflikdən terrorçulara qarşı döyüşmək motivi yox idi. Amma əsas dəyişiklik Bəşər Əsədlə oldu. Ali rəhbər Seyid Əli Xamenei 2024-cü il iyunun 10-da Əsədlə son görüşündə ona mühüm və əsaslı xəbərdarlıq etmişdi. Bundan başqa, İran hələ Livanda müharibə başlamamışdan əvvəl Əsədə terrorçuların güclənməsi ilə bağlı dəfələrlə xəbərdarlıq edib, hətta lazımi tədbirləri təklif edib, lakin bu xəbərdarlıqlara məhəl qoyulmayıb.

Bu proses Əsədin devrilməsinin son saatlarına qədər davam etdi. İran rəsmilərinin Əsədlə danışıqlar aparmaq üçün ən yüksək səviyyədə təmaslar qurması Tehranın Dəməşqi gücləndirmək əzmini göstərdi, lakin Əsəd digər ərəb ölkələrinin və Qərbin vədlərinə arxalanaraq strateji və ölümcül səhv etdi. Bunu bilən İran Əsədi sona qədər razı salmağa çalışsa da, Tehran müdaxilə etməmək qərarına gəldi. Əsəd çox gec başa düşdü ki, düşmənlərinin vədləri boşdur”.

Bəyanatdan göründüyü kimi, İran Əsədi qoruya bilməməsini, gücsüzlüyünü etiraf etməkdənsə, tamamilə fərqli metod seçərək Əsədin özünü zəiflikdə ittiham edir.

Qeyd edək ki, Bəşər Əsədin devrilməzdən bir gün öncə Xameneinin müşaviri ilə görüşdüyü haqda məlumat yayılmışdı.