Fransa Ermənistana hərbi texnikalar verəcək

"Fransa Ermənistana müdafiə təyinatlı hərbi texnikanın verilməsinə razılıq verib".

Bunu Fransa Prezidenti Emmanuel Makron Ermənistanın Baş naziri Nikol Paşinyanla birgə mətbuat konfransında deyib.

"Ermənistanla müdafiə sahəsində əməkdaşlığı davam etdirəcəyik. Fransa müdafiə təyinatlı hərbi ləvazimatların tədarükünə razılıq verib və heç bir gərginlik istəməyərək, tam məsuliyyətlə buna davam edəcək", – deyə Makron bildirib.

Fransa lideri qeyd edib ki, ölkəsi Cənubi Qafqazın sülh, inteqrasiya və əməkdaşlıq regionu olmasını istəyir. Makron fevralın 12-də Ermənistanla şərti sərhəddə azərbaycanlı hərbçinin yaralanmasından təəssüfləndiyini vurğulayıb.

Nikol Paşinyan isə bildirib ki, Ermənistan və Fransa müdafiə sahəsində yeni əlaqələr qurublar. Bu da Cənubi Qafqazda təhlükəsizliyin və sabitliyin təmin edilməsi baxımından mühüm əhəmiyyət kəsb edir.

O əlavə edib ki, Ermənistanın məqsədi regionda düzgün balans yaratmaqdır.