Hakan Fidandan Netanyahuya sərt sözlər | Cinayətkarların tərəfdarı kimi....

İsrailin Baş naziri Benyamin Netanyahunun Konqresdə çıxışı və ayaq üstə alqışlanması sərt tənqidlərə məruz qalıb.

ABŞ Nümayəndələr Palatasının keçmiş spikeri Nensi Pelosinin Baş nazirin nitqini Nümayəndələr Palatasının tarixində baş tutan “ən pis” çıxış adlandırmasından sonra qardaş ölkə Türkiyədən də məsələyə münasibət bildirilib.

Ölkənin xarici işlər naziri Hakan Fidan B.Netanyahunu ayaq üstə alqışlayanları sərt tənqid edib.

“Qəzzada ölənlərin sayı 40 minə yaxınlaşıb. Milyonlarla fələstinli evlərini itirib və yurdunu tərk etmək məcburiyyətində qalıb. İnanıram ki, başda B.Netanyahu olmaqla bu vəziyyəti yaradan bütün İsrail rəsmiləri bir gün ədalət qarşısında cavab verəcək.

Onu alqışlayanlar cinayətkarın tərəfdarları kimi tarixə düşdü və bütün bəşəriyyət insanlarda mənəviyyatın tamamilə yoxa çıxdığı bir mənzərənin şahidi oldu. Nəğmələrdən deyil, haqlarından güc alan və ədalətin bərqərar ediləcəyi günü səbrlə gözləyənlər, şübhəsiz ki, sonda qalib gələcəklər”, – deyə H.Fidan qeyd edib.