Hücumları davam etdirəcəyik | Yəmən və İrandan gecikməyən cavab

ABŞ və Böyük Britaniya Yəməndə husi hərəkatına qarşı əməliyyata başlayıb.

Bu barədə ölkənin Müdafiə Nazirliyi məlumat yayıb.

Bildirilib ki, tərəflərin hərbi hava qüvvələri sözügedən hərəkatın 60-dan çox hədəfinə zərbələr endirib. Pentaqonun xəbərinə görə, ordu xüsusi olaraq sursat anbarlarına və buraxılış qurğularına hücumlar həyata keçirib.

Yəməndən isə hadisəyə reaksiya gecikməyib. “Ənsar Allah” hərəkatının rəsmi nümayəndəsi Məhəmməd Abdel Salam bildirib ki, Yəmənə qarşı edilən bu hücumun heç bir əsası yoxdur:

“Çünki Qırmızı və Ərəb dənizlərində beynəlxalq gəmiçilik təhlükə altında deyil. Biz müharibədə olan Fələstinin limanlarına yola düşən İsrail gəmilərinə hücum etmişik və hücumları davam etdirəcəyik”.

İranın Xarici İşlər Nazirliyi də hadisə ilə bağlı rəsmi Tehranın mövqeyini ortaya qoyub. Nazirliyin sözçüsü Nasir Kənani Yəmənə edilən hücumların beynəlxalq qanunları pozduğunu deyib:

“Bu hücumlar Yəmənin suverenliyi və ərazi bütövlüyünün açıq şəkildə pozulması və beynəlxalq qanunların çeynənilməsidir. Bu hadisə regionda yalnız qeyri-sabitliyə töhfə verəcək. ABŞ-nin təzyiqi bir daha təsdiq edir ki, Ağ Ev İsrailin Qəzzada və regionda törətdiyi faciə və qırğınlarda tam tərəfdaşdır”.

Səudiyyə Ərəbistanı da sözügedən hücumlara səssiz qalmayıb. Ölkə ABŞ və Böyük Britaniyanın Yəməndə husilərin hədəflərinə endirdiyi hava zərbələri fonunda tərəfləri təmkinli olmağa və münaqişədən çəkinməyə çağırıb. Ölkənin Xarici İşlər Nazirliyinin yaydığı bəyanatda rəsmi Ər-Riyadın vəziyyəti yaxından və ciddi narahatlıqla izlədiyi vurğulanıb.

Bu arada ABŞ və Britaniyanın Yəmənə hücumu “Human Rights Watch” Təşkilatı tərəfindən də pislənib. Qurum mülki şəxslərin və obyektlərin hədəfə alınmasını müharibə cinayəti hesab edib.