Husilər ABŞ-yə meydan oxudu | Yəmənin gücünü görəcəksiniz!

“Husilər ABŞ ilə açıq müharibəyə hazırlaşır”.

Bunu hərbi qruplaşmanın siyasi ofisinin üzvü Əli əl-Kəhhumun sosial media hesabında yazıb.

Bildirib ki, Ağ Evin Yəmənə hücumları mənasızdır və husilər onlara qarşı sona qədər müqavimət göstərəcəklər:

"Yəmənin gücünü görəcək və zəlil bir vəziyyətdə bölgədən geri çəkiləcəksiniz. Yəmənin təkəbbürünüzü qıracaq və qüdrətinizi məhv edəcək gücünü öz gözlərinizlə görəcəksiniz.Yəmən hökuməti, rəhbərliyi, silahlı qüvvələri və xalqı baş verənlərdən agahdır və Amerika Birləşmiş Ştatları ilə birbaşa müharibəyə hazırlaşır. Rəsmi Vaşinqton, Birləşmiş Krallıq və İsrailin təmsil etdiyi şeytan ordusu ilə üz-üzə gəlmək bizim üçün böyük şərəfdir".

Məlumat üçün bildirək ki, husilər Ədən körfəzində ABŞ-yə məxsus gəmiyə edilən hücuma görə məsuliyyəti öz üzərinə götürüblər. Hərbi qruplaşmanın sözçüsü Yəhya Sariya da faktı təsdiq edib:

“Allahın köməyi ilə Yəmən Ordusunun dənizdəki qüvvələri raketlərdən istifadə etməklə Ədən körfəzində Amerika gəmisini hədəfə alan hərbi əməliyyat keçirib və vurulan zərbə dəqiq olub. Yəmən Ordusu ölkəmizə qarşı təcavüzdə iştirak edən ABŞ və Birləşmiş Krallığın gəmilərini hədəfə alıb. Yəmən Silahlı Qüvvələri Amerika və İngiltərənin cinayətlərini cəzasız buraxmayacaq və onların cavabını mütləq şəkildə verəcək”.

Qeyd edək ki, ABŞ və Böyük Britaniya yanvarın 12-də husilərin Qırmızı dənizdəki gəmilərə hücumlarına cavab olaraq onlara qarşı əməliyyata başlayıb. Həm Ağ Ev, həm də rəsmi London açıqlamalarında bu addımın zəruri olduğunu bildirib.