İlon İsrailin böyük dostudur | İsrailin Baş nazirindən Maska təşəkkür

İsrailin Baş naziri Benyamin Netanyahu “X” hesabında ABŞ Prezidenti Donald Trampın andiçmə mərasimində nasist salamı verməkdə ittiham olunan İlon Maska dəstəyini ifadə edib.

O bu barədə paylaşım edərək bildirib ki, İlon İsrailin böyük dostudur:

“O, HƏMAS döyüşçülərinin Holokostdan sonra yəhudi xalqına qarşı ən ciddi hücumun törədildiyi 7 oktyabr qırğınından sonra ölkəmizə səfər edib. O vaxtdan bəri İlon Mask dünyada var olan yeganə yəhudi dövlətini məhv etmək istəyən rejim və onun dəstəkçilərinə qarşı İsrailin özünü müdafiə etmək hüququnu qətiyyətlə dəstəkləyib. Bunun üçün ona təşəkkür edirəm”.

Qeyd edək ki, Donald Trampın inaqurasiya mərasimində iştirak edən milyarder İlon Mask üzünü izləyicilərə tərəf tutaraq bir neçə dəfə nasist salamı verib. Onun bu hərəkəti birmənalı qarşılanmayıb. Sosial mediada paylaşılan tənqidlərlə bağlı İ.Mask açıqlama verib. O, hər şey üçün təşəkkür etdiyini və istifadə olunan əl hərəkətinin nasizmlə heç bir əlaqəsi olmadığını deyib.