İran Hərbi Hava Qüvvələrini hazır vəziyyətə gətirdi | Müharibə başlayır?

“İran tarixdəki ən böyük ballistik raket hücumlarını reallaşdırmaqla ərazimizə yüzlərlə raket atıb. Dünyanın heç bir ölkəsi öz şəhərlərinə və vətəndaşlarına belə hücumu qəbul etməz. İsrailin də özünü müdafiə etmək və bu hücumlara cavab vermək hüququ var və bunu edəcək”.

Bunu İsrailin Baş naziri Benyamin Netanyahu bildirib. Baş nazir həmçinin Fransa Prezidenti Emmanuel Makronun Qəzzadakı münaqişənin həlli üçün İsrailə silah tədarükünü dayandırmağa çağıran bəyanatlarına sərt cavab verib.

B.Netanyahu Fransa liderinin sözlərini biabırçılıq adlandırıb və ölkəsinin Qərbin köməyi olmadan belə bütün rəqiblərini məğlub edə biləcəyini bildirib:

“Biz İranın başçılıq etdiyi qüvvələrə qarşı mübarizə apararkən bütün sivil dövlətlər İsrailin yanında möhkəm dayanmalıdır. Bununla belə Prezident E.Makron və bəzi digər Qərb liderləri indi İsrailə silah embarqosu tətbiq etməyə çağırırlar. Ayıb olsun!”, – deyə B.Netanyahu bildirib.

Həmçinin İsrail Müdafiə Ordusunun mətbuat katibi Daniel Haqari də İranın hücumlarına cavab verəcəklərini dilə gətirib.

“Russia Today”in məlumatına görə, İran isə oktyabrın 9-dək ölkənin qərbindəki hava məkanını bağlayıb. Bildirilib ki, İran Hərbi Hava Qüvvələri İsrailin cavab zərbəsi ərəfəsində ən yüksək hazırlıq vəziyyətinə gətirilib.