İran və ABŞ-nin növbəti görüşü harada baş tutacaq? | “Bu danışıqlar faydasızdır...”

ABŞ və İran arasında nüvə məsələsi ilə bağlı danışıqların növbəti raundu İtaliyanın paytaxtı Romada keçirilə bilər.

Bu barədə "Axios" mənbələrə istinadən məlumat verib.

Bildirilir ki, ABŞ və İran rəsmilərinin görüşü şəxsi formatda keçirilə, Oman vasitəçiləri də görüşdə iştirak edə bilərlər.

İran Xarici İşlər Nazirliyi ABŞ ilə danışıqların formatının dəyişdirilməsini istisna edir. Görüşlər yalnız vasitəçilərlə davam edəcək.

Bu barədə İran XİN-in rəsmi nümayəndəsi İsmayıl Bəqai məlumat verib.

"Tərəflərdən birinin təhdidlərə əl atmağa davam etdiyi bir şəraitdə birbaşa danışıqlar faydasız və səmərəsizdir. Ona görə də biz əvvəllər seçilmiş formatdan istifadə etməyə davam edəcəyik", − deyə o, mətbuat konfransı zamanı bildirib.

Tehran ABŞ ilə danışıqların növbəti raundunun yerini yalnız Omanla məsləhətləşdikdən sonra rəsmən elan edəcək.

Xarici mediada yayılan digər informasiyada isə deyilir ki, ikinci görüşdən əvvəl Atom Enerjisi üzrə Beynəlxalq Agentliyin (AEBA) baş direktoru Rafael Qrossi İrana gedəcək. Onun ölkədəki nüvə obyektlərində monitorinq və yoxlama prosedurlarını müzakirə edəcəyi gözlənilir.

Xatırladaq ki, aprelin 12-də Omanda İranın nüvə proqramı ətrafında yaranmış vəziyyəti həll etmək üçün Tehran və Vaşinqton nümayəndələri arasında danışıqlar keçirilib. İkinci tur aprelin 19-da keçiriləcək.