İrəvandan BMT-yə ratifikasiya sənədi: Rusiyanı qəzəbləndirən qərar

Ermənistan Roma Statutunun ratifikasiya sənədinin əslini BMT-yə təqdim edib.

Bu barədə Fransa xarici işlər naziri Ketrin Kolonna sosial media hesabında bildirib.

“İndi Ermənistan ərazisində törədilmiş hərbi cinayətlərə Beynəlxalq Cinayət Məhkəməsində baxıla bilər”, – deyə paylaşımda qeyd edilib.

Fransanın Ermənistandakı səfirliyi də məsələyə münasibət bildirərək rəsmi İrəvanın bu addımını alqışlayıb.

Qeyd edək ki, sənədin orijinalının təhvil verilməsi ilə Ermənistanın Beynəlxalq Cinayət Məhkəməsinə qoşulması prosesi başa çatıb. Bununla Ermənistan məhkəmənin nizamnaməsinə qoşulan 124-cü ölkə olub.

Məlumat üçün bildirək ki, Ermənistan parlamenti 2023-cü ilin oktyabrın 3-də Roma Statutunu qeyd-şərtsiz ratifikasiya edib. Qanunverici orqanın 60 deputatı layihənin lehinə, 22-si əleyhinə səs verib.

Rəsmi Moskva isə bu addımı düşmənlik əlaməti kimi qiymətləndirib. Sənədə görə, Rusiya Prezidenti Vladimir Putin Ermənistana səfər edəcəyi təqdirdə həbs olunmalıdır.