İsrailin yeni planında nələr var?

İsrailin Baş naziri Benyamin Netanyahu yüksək vəzifəli məmurlardan ibarət gizli qrup yaradıb.

Bu barədə yerli media məlumat yayıb.

Xəbərə görə, qrup Qəzza zolağının gələcəyini müzakirə etmək üçün yaradılıb. Bura İsrail kəşfiyyat agentliyi Şin Betin və Xarici Kəşfiyyat Xidmətinin üzvləri, o cümlədən ölkənin ABŞ-dəki səfiri Maykl Hersoq daxildir.

Medianın məlumatında qeyd olunub ki, qrupun üzvləri bu günə qədər dörd dəfə görüşüblər. Bu həftə daha bir toplantının keçirilməsi gözlənilir. Mənbənin məlumatına görə, İsrail bu barədə ABŞ administrasiyasını məlumatlandırıb.

Bundan başqa o da bildirilib ki, rəsmi Təl-Əviv yaxın zamanda Qəzza zolağının idarə edilməsi planını da Ağ Evə təqdim edəcək.

Xatırladaq ki, ABŞ və İsrail rəsmiləri hələ oktyabrın 21-də Qəzza zolağının gələcəyi barədə müzakirələr aparıblar. Onlar bildiriblər ki, bu, HƏMAS-ın devrilməsindən sonra mümkün olacaq.