KTMT Ermənistanın suallarını cavabsız qoyur | Simonyan

Rusiya ilə Ermənistan arasında günlərdir davam edən Kollektiv Təhlükəsizlik Müqaviləsi Təşkilatı mövzusuna dair fikir ayrılığı səngimək bilmir.

Bu dəfə Ermənistan parlamentinin spikeri Alen Simonyan jurnalistlərə verdiyi açıqlamasında Nikol Paşinyanın “KTMT-dəki fəaliyyətimizi dondururuq” ifadəsinə aydınlıq gətirib və hökumət rəhbərinin fikirlərinə haqq qazandırıb:

“Məsələ ondadır ki, Baş nazir Nikol Paşinyan bizim KTMT-də iştirak etməməyimizin elə faktiki olaraq dondurulmuş münasibətlərə bərabər olduğunu bildirib. Biz sözügedən təşkilata sual ünvanlamışıq, lakin bunun cavabını hələ də almamışıq.

Biz soruşduq ki, KTMT-nin məsuliyyət zonası haradadır, siz Ermənistan Respublikasının sərhədlərini tanıyırsınızmı, Ermənistan hansı sərhədlər çərçivəsində KTMT-yə qoşulub? Hələlik bunlara cavab yoxdur. Mənim şəxsi fikrim budur ki, KTMT özü-özünü söndürüb və fəaliyyət göstərmir”.

Alen Simonyan jurnalistlərə açıqlamasında həmçinin Rusiya hərbçilərinin İrəvanda Zvartnots hava limanından çıxarılmasına da münasibət bildirib. Onun sözlərinə görə, onların aeroportdan getməsi daha doğru addım olar. Spiker əlavə edib ki, Ermənistan sərhədlərini qoruya biləcək, lakin rusiyalıların bunu edib-etməyəcəyinə əmin deyil.

Alen Simonyan eyni zamanda regional mövzuya da toxunub. Qeyd edib ki Azərbaycan və Türkiyə ilə dinc yanaşı yaşamağın əleyhinə deyil. “Kimin başqa variantı varsa, onu dinləməyə hazıram”, – deyə parlament sədri jurnalistlərə müraciət edib.

Spiker sonda İrəvanla Bakı arasında münasibətlərdə irəliləyişin olduğunu da vurğulayıb.