London Ağ Evin sülh təkliflərinə qarşı çıxdı | Bunlara Kiyev qərar verməlidir!

Böyük Britaniyanın Baş naziri Kir Starmer Ukrayna ilə bağlı ABŞ Prezidenti Donald Trampın sülh təkliflərinə qarşı çıxıb.

O, Trampa etiraz olaraq bildirib ki, Ukraynanın cəsarətli Prezidenti Volodimir Zelenski atəşkəslə bağlı razılaşmanın əldə olunmamasında günahkar deyil.

Kir Starmer Krımı Rusiya ərazisi kimi tanımaqdan da imtina edib.

“Teleqraf”a müsahibəsində “Moskva qeyd-şərtsiz atəşkəslə razılaşmalıdır” deyən Starmer əlavə edib ki, “Ukraynanın adından danışmaq lazım deyil, problemlərin necə həll edilməsinə Kiyev qərar verməlidir.

Donald Trampın sülh təklifləri ilə razı olmasa da, Kir Starmer “istəklilər koalisiyasının” təhlükəsizliyinə təminatı ABŞ-dən istəyir. Koalisiyanın Ukraynaya hərbi kontingent yerləşdirmək planı isə hələ müzaikirə mövzusudur.

Müzakirələrə səbəb olan digər xəbər isə Zelenskinin sülhlə bağlı Ağ Evə göndərdiyi tələblərdən ibarət 5 bəndlik paketdir. Çünki bu tələblər Trampın şərtləri ilə ziddiyyət təşkil edir.

Məsələn, Zelenski Krımın Ukraynaya aid olduğunu deyib, ümumilikdə 2014-cü ildə Kremlin nəzarətinə keçən torpaqların rəsmən Rusiya ərazisi kimi tanınmamasını tələb edib.

Bundan başqa, Donald Trampın özü də Rusiyanın hücumları davam etdirməsindən narazıdır.

ABŞ lideri sosial şəbəkə hesablarında aprelin 24-də Ukrayna paytaxtına hücumları şərh edib:

“Rusiyanın Kiyevə zərbə endirməsi yersiz və vaxtsızdır. Vladimir, dayan! Hər həftə 5 min əsgər ölür. Gəlin sülh sazişi imzalayaq”.

O, son açıqlamalarının birində bildirib ki, Krımı geri qaytarmaq Ukrayna üçün çox çətin olacaq.

Qeyd edək ki, Britaniyanın Baş naziri Ağ Evin ritorikasını düzgün hesab etmir. Buna baxmayaraq, o, yayda atəşkəsin əldə olunacağını bildirib.