Makron təcili xalqa müraciət etdi | Müharibə genişləndi, vəziyyət gərginləşdi

“Rusiya bütün Avropa üçün təhdidə çevrilib. Avropanın gələcəyinə Vaşinqtonda və ya Moskvada qərar verilməməlidir”.

Bu barədə Fransa Prezidenti Emmanuel Makron xalqa müraciətində deyib.

E.Makron müraciətini beynəlxalq vəziyyətlə əlaqələndirib və fransızların bununla bağlı haqlı olaraq narahatlıq keçirdiklərini qeyd edib.

O, ABŞ-nin Ukraynadakı müharibə mövzusunda mövqeyini dəyişdiyinə və Avropa İttifaqı mallarına yüksək gömrük rüsumu tətbiq etməyi planlaşdırdığına diqqət çəkib.

“Biz yeni bir eraya qədəm qoyuruq”, – deyən E.Makron Rusiyanın Ukraynadakı müharibəni qlobal münaqişəyə çevirdiyini, buna Şimali Koreya əsgərləri və İran hərbi texnikası istifadə edərək nail olduğunu qeyd edib. Həmçinin Rusiyanın hərbi potensialını artırdığını deyib.

“Kim Rusiyanın Ukraynada dayanacağına inanır? Rusiya artıq Fransaya, Avropaya qarşı təhdidə çevrilib. Sülhə gedən yol Ukraynasız mümkün deyil. Sülh Ukraynanın təslim olması yolu ilə əldə edilə bilməz”, – deyə E.Makron vurğulayıb.

O əlavə edib ki, ölkə müdafiəsini gücləndirməlidir.

“Biz Avropadakı ən effektiv orduya malikik. Bununla yanaşı, nüvə silahı tətbiqi imkanlarımız var. Bu bizi qonşularımızdan daha yaxşı qoruyur”, – deyə Fransa Prezidenti qeyd edib.