Moskvadan sığınacaq istəyənlərin siyahısı | Kimlər Rusiyadan kömək istədi?

Suriyada baş verənlər bütün dünyada müzakirə mövzusuna çevrilib.

Müzakirə olunan məsələlərdən biri də sabiq ölkə prezidenti Bəşər Əsədin Rusiyadan sığınacaq alması olub. Lakin bu, tarixdə ilk belə hadisə deyil.

İlk olaraq bu məsələdə Qazaxıstan lideri Kasım-Jomart Tokayev yada düşür. O, 2022-ci ildə ölkədə yanacağın qiymətinin qalxması səbəbindən ciddi etirazlarla üzləşib. Bu zaman lider rəsmi olaraq sığınacaq istəməsə də, alovlanan iğtişaşları yatırmaq üçün Rusiyadan hərbi yardım istəyib və KTMT çərçivəsində Qazaxıstana qoşun göndərilib.

Növbəti lider Belarus Prezidenti Aleksandr Lukaşenkodur. 2020-ci ilin müzakirələrlə dolu prezident seçkilərindən sonra liderə qarşı etirazlar başlayıb. O, Rusiyaya qaçmasa da, etirazlar və seçki saxtakarlığına dair iddiaların fonunda hakimiyyətini qoruyub saxlamaq üçün Rusiyadan hərbi və siyasi dəstək istəyib.

2024-cü ilin noyabrında isə Belarus lideri Rusiya Prezidenti Vladimir Putinə sadiqliyini ifadə edərək “Oreşnik” ballistik raketlərinin öz ölkəsinin ərazisində saxlanılmasını təklif edib.

Kremlə yardım üçün üz tutan daha bir ölkə başçısı da Ukraynanın keçmiş prezidenti Viktor Yanukoviçdir. O, 2014-cü ildə 100-dən çox insanın ölümü ilə nəticələnən “Avromaydan” iğtişaşları zamanı hakimiyyətdən devrilib. Daha sonra vəzifəsindən uzaqlaşaraq Rusiyaya qaçıb. Orada sığınacağın verilməsi ilə Viktor Yanukoviç Ukraynadakı Rusiyanın dəstəklədiyi separatçıların simvoluna çevrilib.