Müharibə nə zaman bitəcək? | Netanyahu sülhün ilkin şərtlərini açıqladı

Misir-Qəzza zolağı sərhədindəki "Rəfah" nəzarət-buraxılış məntəqəsi növbəti xəbərdarlığa qədər bağlı qalacaq.

Bu barədə İsrailin Baş naziri Benyamin Netanyahu bildirib.

Onun sözlərinə görə, keçidin açılması məsələsinə HƏMAS ölən girovların qalıqlarının qaytarılması ilə bağlı razılaşmanın müddəalarını yerinə yetirdikdən sonra baxılacaq.

Bununla yanaşı, Fələstinin Qahirədəki səfirliyi Misir və Fələstinin Qəzza zolağı arasındakı Rəfah sərhəd-keçid məntəqəsinin oktyabrın 20-də fəaliyyətini bərpa edəcəyini açıqlayıb.

Baş nazir onu da əlavə edib ki, Qəzzada müharibə HƏMAS və İsrail arasında sülh razılaşmasının bütün şərtləri yerinə yetirildikdə sona çatacaq. "Bu ilk növbədə, birinci mərhələni – bütün girovlarımızın qaytarılmasını əhatə edir. Biz hazırda bunun üzərində işləyirik", – deyə o qeyd edib.

Netanyahunun sözlərinə görə, İsrail razılaşmanın tam yerinə yetirilməsində qətiyyətlə israrlıdır. "Əgər HƏMAS silahlarını yerə qoymaqdan imtina edərsə, biz buna güc yolu ilə nail olacağıq. Yalnız HƏMAS tərk-silah edildikdən və Qəzza demilitarizasiya edildikdən sonra müharibə nəhayət başa çatacaq", – deyə İsrailin Baş naziri vurğulayıb.