Müstəqillik günü Moskvada qeyd edildi

28 May – Müstəqillik Günü münasibətilə Rusiya paytaxtında təntənəli qəbul keçirilib.

Azərbaycanın Rusiyadakı Səfirliyi tərəfindən təşkil olunan tədbirdə Rusiya xarici işlər nazirinin müavinləri, Rusiyada akkreditə olunan diplomatik nümayəndəliklərin rəhbərləri iştirak ediblər.

Tədbirdə Azərbaycanın Rusiyadakı səfiri Polad Bülbüloğlu bildirib ki, 105 il əvvəl bünövrəsi qoyulmuş müstəqillik tariximizin qorunub saxlanılması və möhkəmləndirilməsi Azərbaycan xalqının ümummilli lideri Heydər Əliyevin adı ilə bağlıdır.

İki ölkə arasındakı münasibətlərin hazırkı səviyyəsindən də danışan diplomat qeyd edib ki, son onilliklər ərzində Azərbaycan-Rusiya əməkdaşlığı möhkəmlənib və genişlənib.

Səfir həmçinin Azərbaycan Ordusunun öz ərazilərinin 30 illik işğalına son qoyduğunu da xatırladıb və münaqişədən sonrakı nizamlanma səylərində Rusiyanın vasitəçilik rolunu yüksək qiymətləndirib.

Rusiya xarici işlər nazirinin müavini Mixail Qaluzin isə qeyd edib ki, Azərbaycan iqtisadi və sosial sahələrdə heyrətamiz uğurlar qazanıb, dünya miqyasında layiqli nüfuza malikdir və beynəlxalq gündəmdə olan bir çox mühüm məsələlərin həllində fəal rol oynayır.