Müttəfiqlər İsraili meydanda tək qoyur? | Netanyahu özündən çıxdı

Qəzza zolağında hərbi əməliyyatın bərpası qərarı İsrailə baha başa gələcək. Bu barədə ABŞ-nin “Washington Post” nəşri yazıb.

“Böyük Britaniya, Fransa və Kanadanın birgə bəyanatı bunu sübut etdi. Bu ölkələr İsrail rəhbərliyindən hərbi əməliyyatları dayandırmağı tələb edir və onun üçün ciddi nəticələrin olacağını vəd edirlər”, – deyə məlumatda vurğulanıb.

Qeyd edək ki, Böyük Britaniya artıq İsraillə azad ticarət rejiminin yaradılması ilə bağlı danışıqları dayandırıb. Əlavə olaraq, Avropa İttifaqı Təl-Əvivlə ticarət müqaviləsinə yenidən baxılması prosesinə başlayacaq.

Bütün bunlara İsrailin Baş naziri Benyamin Netanyahu sözügedən ölkələri HƏMAS-a dəstək olmaqda günahlandıraraq cavab verib.

İddiaya görə, ölkənin ən yaxın müttəfiqi olan ABŞ belə artıq Netanyahu hökumətinə qarşı səbrini itirir. Prezident Donald Tramp Qəzzada sülh danışıqlarının fonunda, İsrail rəhbərliyinin hərəkətlərindən məyusdur. Təzyiqlərin artması isə Netanyahunu müəyyən güzəştlərə getməyə məcbur edir.

Bu təzyiqlər Qəzzaya humanitar yardımın çatdırılması ilə bağlıdır. Lakin görünən odur ki, Təl-Əviv tərəfi dünyadan təcrid olunması ehtimalını daha üstün tutur.