Netanyahu özündən çıxdı: Onları məhv edəcəyik!

İsrail HƏMAS-ı məğlub etdikdən sonra Qəzza zolağına hakim olmaq, onu işğal etmək və ya idarə etmək niyyətində deyil.

Bunu İsrailin Baş naziri Benyamin Netanyahu bildirib.

O qeyd edib ki, ölkəsi buna baxmayaraq, lazım gələrsə, yaraqlılardan gələn təhlükənin qarşısını almaq üçün bütün tədbirlərə əl atacaq:

“Düşünürəm ki, Qəzzanın gələcəyinin necə olacağı aydındır: Bu döyüşün sonunda HƏMAS olmayacaq. Biz HƏMAS-ı təkcə özümüz üçün deyil, hamı üçün, sivilizasiya naminə, fələstinlilərin və israillilərin naminə məhv edəcəyik.

Biz Qəzzanın demilitarizasiyasını, deradikalizasiyasını və yenidən qurulmasını görməliyik və bütün bunlara nail olmaq olar. Qəzzada hökumət qurulmalıdır. Lakin İsrail 7 oktyabr hücumu kimi hücumun bir daha təkrarlanmaması üçün əlindən gələni edəcək.

Beləliklə, lazım gələrsə, Qəzzaya girəcək və qatilləri zərərsizləşdirəcək etibarlı qüvvələrə malik olmalıyıq. Çünki bu, HƏMAS kimi strukturun dirçəlməsinə mane olacaq”.

Qeyd edək ki, İsrailin Baş naziri B.Netanyahunun qeyri-müəyyən müddətə Qəzzanın təhlükəsizliyinə İsrailin cavabdeh olacağına dair açıqlamaları onların əsas müttəfiqi olan ABŞ-nin reaksiyasına səbəb olub. Vaşinqton Qəzzanın müharibədən sonra işğalına qarşı çıxıb və anklavın fələstinlilər tərəfindən idarə edilməli olduğunu bildirib.