Netanyahudan ABŞ səfəri ilə bağlı açıqlama | Belə danışıqlara getməyəcəyəm!

Yaxın Şərqdə davam edən danışıqlar fonunda, İsrailin Baş naziri Benyamin Netanyahu Vaşinqtona rəsmi səfəri ilə bağlı açıqlama verib.

Təl-Əviv lideri Fələstin dövlətinin qurulması ilə razılaşmayacağını bildirib.

“Fələstin dövlətinin qurulması HƏMAS üçün qələbə, İsrail üçün məğlubiyyətdir. Əgər Fələstin dövləti istəyirlərsə, onu Səudiyyə Ərəbistanında qura bilərlər. Onların geniş ərazisi var”, – deyə o vurğulayıb.

Beləliklə, İsrailli lider Fələstin dövlətinin yaradılması şərti barəsində heç bir ölkə ilə danışıqlara getməyəcəyini qeyd edib.

Bundan əlavə, Netanyahu Səudiyyə Ərəbistanı ilə normallaşma prosesinə də toxunub: “Zənnimcə, iki ölkə arasında sülh mümkündür. Yəni, bu baş tuta bilər”.

Məlumat üçün bildirək ki, Səudiyyə Ərəbistanının Xarici İşlər Nazirliyi Fələstin dövlətinin yaradılmasına dair mövqeyinin qəti və sarsılmaz olduğunu, vəliəhd şahzadə Məhəmməd bin Salmanın da bunu açıq şəkildə təsdiqlədiyini bəyan edib.