Paşinyanın arvadı hədəfə alındı | Gündəmi alt-üst edən “əməliyyat”ın pərdəarxası

Ermənistanla bağlı saxta məqalədə jurnalistlərin adından istifadə olunub.

Fransa telekanalı “France 24” jurnalistlərinin şəxsi məlumatlarından istifadə edilməklə həyata keçirilən kiberoperasiya barədə açıqlama yayıb.

Kanalın bəyanatına görə, bu hücum Ermənistan əleyhinə yönəlib və prorus kampaniyalarının bir hissəsidir.

“France 24” nümayəndələri “Intelligence Online”a verdikləri şərhdə bildiriblər ki, onların jurnalistləri mütəmadi olaraq saxta müəllifliklə bağlı dezinformasiya kampaniyalarının hədəfinə çevrilir. Məsələ 6 jurnalistin adının yanlış olaraq “EuLeaks” saytında yayılan məqalədə göstərilməsindən sonra üzə çıxıb.

Həmin saxta məqalə 12 avqustda dərc olunub və Ermənistan Baş naziri Nikol Paşinyanın həyat yoldaşı Anna Akopyanı vəsaitlərin mənimsənilməsində ittiham edib. Yazı James Creedon və daha 5 “France 24” əməkdaşının adı ilə imzalanıb. Mütəxəssislərin qiymətləndirməsinə görə, bu material Ermənistan hakimiyyətini gözdən salmaq məqsədi daşıyır.

“Intelligence Online”ın məlumatına görə, əməliyyat daha əvvəl də oxşar dezinformasiya kampaniyalarında iştirak etmiş, Rusiya ilə əlaqələndirilən şəbəkələr tərəfindən aparılır.

Bundan başqa, “EuLeaks” domeni 2025-ci ilin avqustunda yenidən aktivləşdirilib. Halbuki əvvəllər bu domen Avropa Parlamentinin “Yaşıllar/Avropa Azad Alyansı” qrupuna məxsus idi. Domenin təkrar qeydiyyatı izləri gizlətmək və ictimaiyyəti çaşdırmaq məqsədi daşıyır.