Razılaşma barədə şərtlər | Yaxın Şərqi nə gözləyir?

“Paris Beyruta İsrail və Livan arasında gərginliyi azaltmaq üçün bir plan təklif edib”.

Belə bir başlıqla Səudiyyə Ərəbistanının “Əl Ərəbiyyə” telekanalı məlumat yayıb.

Bildirilib ki, Fransa Prezidenti Emmanuel Makron Livanın Baş naziri Nəcib Mikati ilə Livan-İsrail sərhədində gərginliyi azalda biləcək planı müzakirə edib. Xəbərə görə, tərəflər artıq 2 prioritet məsələdə razılığa gəlib.

Razılaşmaya əsasən, “Hizbullah” qüvvələri sərhəd zonasından çıxarılmalıdır. İsrail də yalnız bundan sonra Livanın hava məkanında uçuşları dayandıracaq, hərbi əməliyyatlardan çəkinəcək.

Amma rəsmi Təl-Əvivin sözügedən razılaşmaya dair fikirləri bir az fərqlidir. İsrailin Baş naziri Benyamin Netanyahu dəfələrlə vurğulayıb ki, “Hizbullah”, HƏMAS və digər qruplaşmalarla danışıqlar deyil, mübarizə sona qədər davam etdiriləcək.

Hökumət rəhbərinin bu alovlu açıqlamasına qarşılıq İsrail mediası xatırladıb ki, B.Netanyahu, sən demə, bu tip xahişlə aylar öncə E.Makrona müraciət edib. Qeyd olunub ki, Fransa Prezidenti də İsrailin Baş nazirinin istəklərini nəzərə alaraq, ancaq təkliflər paketinə dəyişiklik edərək dolayı yolla hər iki tərəfin istəyinə uyğun paket hazırlayıb.

Xatırladaq ki, E.Makron ilə N.Mikatini görüşü Parisdə baş tutub. Söhbət zamanı Fransa Prezidenti bildirib ki, o, Livanın sabitliyi və Yaxın Şərqdə gərginliyin artmaması ilə bağlı fəaliyyətini davam etdirir.