Rusiyadakı "Crocus" terroru ilə bağlı qalmaqallı açıqlama

“Ukrayna və NATO döyüş meydanında gücsüzləşdikcə Kiyev daha çox terror üsullarına əl atır”.

Belə bir açıqlama ilə Rusiya Təhlükəsizlik Şurasının katibi Nikolay Patruşev çıxış edib.

O, yerli mediaya həmçinin "Crocus"da törədilən terror aktında İŞİD-in rolu ilə bağlı da danışıb:

“Martın 7-də ABŞ və Böyük Britaniya səfirlikləri Moskvada terror aktları təhlükəsi ilə bağlı xəbərdarlıqlar dərc etdikdən sonra Ukrayna tərəfi terror törədib. Çünki bizim tərəfimizdən aparılan istintaq araşdırmalarının bir ucu gedib Kiyevə çıxır.

“Crocus”da terror aktı ilə bağlı xəbərlərdən dərhal sonra isə Qərb Ukraynanın iştirak etməməsi tezisini fəal şəkildə təbliğ etdi. Hadisənin guya ekstremist qruplaşmalar tərəfindən törədildiyinə dair hansısa əsaslar gətirərək Ukraynanı müdafiə etməyə çalışdı.

Ola bilsin ki, İŞİD-in Əfqanıstan qolunun üzvləri tərəfindən törədilib. Lakin bu iyrənc cinayətin sifarişçisi və sponsorunun kim olduğunu tez bir zamanda müəyyən etmək daha vacibdir. Onun izləri isə Ukrayna xüsusi xidmət orqanlarına aparır. Hər kəs yaxşı bilir ki, Ukrayna tamamilə ABŞ-nin nəzarətindədir”.

Xatırladaq ki, martın 22-də Moskvada “Crocus City Hall” konsert zalında yerli “Piknik” rok qrupunun səhnəyə çıxışı ərəfəsində terror aktı törədilib. Atəş açaraq binaya daxil olan silahlı şəxslər məkanı yandırdıqdan sonra hadisə yerindən qaçıblar. Son məlumata görə, terror aktı nəticəsində azı 144 nəfər həlak olub.