Son 24 saatda həlak olan Livan sakinlərinin sayı açıqlandı

İsrail mülki itkilərin qarşısını almaq üçün hərbi əməliyyatlar apararkən daha diqqətli davranmalıdır.

Bunu ABŞ Prezidenti Co Bayden deyib. O həmçinin qeyd edib ki, İsrailin İranın, “Hizbullah”ın və Yəməndəki “Ənsar Allah” hərəkatının hücumlarına cavab vermək hüququ var.

“Ancaq onlar mülki itkilərin qarşısını almaq üçün daha diqqətli olmalıdırlar”, – deyə C.Bayden bildirib.

O həmçinin əlavə edib ki, İsrail hələ İrana cavab zərbəsi endirmək barədə qərar verməyib.

“İsrail İranın hərəkətlərinə cavab olaraq nə edəcəyinə hələ qərar verməyib, bu müzakirə olunur. Mən onların yerində olsaydım, neft yataqlarına hücumdan başqa alternativlər haqqında düşünərdim”, – deyə Ağ Ev rəhbəri bildirib.

Bu arada, Yaxın Şərqdə münaqişənin demək olar ki, 1 il davam edən gərginləşməsi zamanı İsrailin zərbələri nəticəsində 2 mindən çox Livan sakini həlak olub, 9,5 minə yaxını isə yaralanıb.

Məlumata görə, son 24 saat ərzində 153 hava hücumu qeydə alınıb. Nəticədə 37 nəfər həlak olub, 151 nəfər isə yaralanıb.