Trampın Macarıstanın Baş naziri ilə görüşü aranı qatdı | Baydendən Orbana ağır sözlər

Macarıstanın Baş naziri Viktor Orban Floridadakı Mar-a-Laqo malikanəsində ABŞ-nin keçmiş prezidenti Donald Trampla görüşüb.

Məlumata görə, tərəflər arasında danışıqlar 1 saat davam edib. Orban və Trampın hansı mövzuları müzakirə etdikləri açıqlanmasa da, ABŞ-yə səfərdən əvvəl Macarıstan rəsmiləri Ukraynadakı vəziyyəti və iki ölkə arasındakı münasibətləri nəzərdən keçirəcəklərini bildiriblər.

Macarıstan hökuməti Trampın noyabr seçkilərində qalib gəlməsini və Ağ Evə qayıtmasını arzuladığını gizlətmir. ABŞ-nin hazırkı Prezidenti Co Bayden isə Macarıstanın Baş naziri Viktor Orbanı diktaturaya can atmaqda ittiham edib.

Ağ Ev rəhbəri Orbanın Trampla görüşünü şərh edərkən macar siyasətçi haqqında danışıb. “Trampın Mar-a-Laqoda kiminlə görüşdüyünü bilirsiniz? Demokratiyanın işlədiyinə inanmadığını birbaşa deyən, NATO-nun yeganə üzvü kimi diktaturaya nail olmağa can atan macarıstanlı Orbanla”, – deyə Bayden bildirib.

Qeyd edək ki, Viktor Orban bir müddət əvvəl Ukraynadakı münaqişəni dayandırmağa qadir olan şəxsin Donald Tramp olduğunu bildirmişdi.