Ukrayna NATO-ya üzv olmağa bir addım yaxınlaşıb

“Sizin NATO sammitində iştirak etməyiniz həqiqətən də şərəfdir. Prezident Vladimir Putin keçən il Ukraynanı işğal edərkən Ukrayna xalqının şücaətini, Ukrayna qüvvələrinin cəsarətini və Ukrayna siyasi rəhbərliyinin qətiyyətini lazımınca qiymətləndirmirdi. Onlar NATO alyansının birliyini və gücünü də lazımınca dəyərləndirmirdilər. NATO lazım olan müddətdə sizinlə birlikdə olmağa davam edəcək”.

Bunu NATO-nun Baş katibi Yens Stoltenberq Vilnüs sammitində Ukrayna Prezidenti Volodimir Zelenski ilə görüşü zamanı deyib.

“Təşkilatın müttəfiqləri son bir il ərzində on milyardlarla dollar yardım göstərdilər. İndi biz Ukraynanı NATO-ya yaxınlaşdıran üç hissədən ibarət paket, çoxillik praktiki yardım proqramı, yeni NATO-Ukrayna Şurasının yaradılması və Ukraynanın NATO-ya üzv olacağını bir daha təsdiqləyərək Üzvlük Fəaliyyət Planı tələbini aradan qaldırırıq. Ukraynaya yeni çoxillik yardım proqramımız sizə Sovet dövründən NATO avadanlığı və standartlarına keçməyə kömək edəcək və Ukrayna qüvvələri NATO ilə tam qarşılıqlı fəaliyyət göstərəcək", – Baş katib bildirib.