Yaxın şərqdə gərginlik: 3-cü dünya müharibəsinin ayaq səsləri

Yaxın Şərqdə davam edən amansız müharibə dünya ictimaiyyətinin diqqətini hələ də bu bölgədə saxlamaqdadır.

Öldürülən günahsız şəxslərin sayının hər an artması, evlərin dağıdılması, humanitar böhran və sair kimi hallar yoluxucu xəstəliklərin yayılması riskini də artırıb.

Təəssüf ki, beynəlxalq təşkilatlar və böyük dövlətlər də müharibənin dayandırılması üçün heç bir səy göstərmir. Əksinə, ABŞ və Avropa İttifaqının aparıcı ölkələri münaqişənin danışıqlar masası arxasına keçməsində qətiyyən maraqlı görünmürlər.

Müharibənin qızışdırılmasında və genişlənməsində maraqlı olan tərəflər bununla Aralıq dənizinin Qəzza bölgəsindən Türkiyə sərhədinə qədər olan sahilində tam nəzarəti ələ keçirmək və yaxud bu coğrafiyada nəzarətsiz zona yaratmaq istəyirlərsə, bu cəhd beynəlxalq səviyyəli geosiyasi böhran yaratmaq deməkdir. Çünki sahil ölkələrinin sayına və ərazisinə görə ən geniş coğrafiyanı əhatə edən Aralıq dənizi ətrafında yerləşən və onlara tərəfdar olan ölkələrin heç biri bu hövzədəki maraq və mənafelərindən geri çəkilməyəcəklər.

Ümumiyyətlə, bu ölkələrin öz mənafelərini hansısa imperialist tərəfin iddialarına qurban verib geri çəkiləcəyi təsəvvür olunan bir məsələ sayıla da bilməz. Bu isə o deməkdir ki, İsrail-Fələstin torpaqlarında davam edib əsl insanlıq faciəsi yaradan bu müharibənin yeganə çıxış yolu sülh danışıqlarıdır.

Bu danışıqlar yalnız o halda bəhrə verəcək ki, BMT Təhlükəsizlik Şurasının daimi üzvləri başda olmaqla dünya ictimaiyyəti məsələyə beynəlxalq hüquq prizmasından yanaşaraq, dini, irqi və milli ayrı-seçkiliyə yol vermədən, vicdanın və ədalətin hökmü ilə müharibənin sülhlə əvəz olunmasını istəyəcəklər. Əks halda üçüncü dünya müharibəsinin ayaq səsləri daha güclü eşidiləcək.