Bakıda uçqunun baş verdiyi yer | Aidiyyəti qurumlar əraziyə cəlb olundu

Oktyabrın 28-də Səbail rayonu, Badamdar qəsəbəsi ərazisində qaya parçaları uçaraq Bakı Kənar Dairəvi yoluna tökülüb.

Hadisə ilə əlaqədar dərhal əraziyə Fövqəladə Hallar Nazirliyinin Xüsusi Riskli Xilasetmə Xidməti və Dövlət Yanğından Mühafizə Xidmətinin qüvvələri cəlb olunub.

Oktyabrın 29-u səhər saatlarında isə fövqəladə hallar naziri Kəmaləddin Heydərov uçqun baş verən əraziyə gələrək görülən işlərlə yaxından tanış olub, müvafiq tapşırıqlar verib.

Qeyd edək ki, şəhərin giriş hissəsində nəqliyyat vasitələrinin hərəkəti tam məhdudlaşdırılmasa da, müəyyən məhdudiyyətlər qoyulub.

Bu isə sözügedən ərazidə tıxacın yaranmasına səbəb olub.

“Təqribən yarım saatdan çoxdur ki, gözləyirəm. Artıq ikinci dəfədir belə hadisə baş verir. Bundan əvvəl də yolu bağlamışdılar”, – deyə sürücülərdən biri bildirib.

Qeyd edək ki, hazırda FHN əməkdaşları uçqun baş verən ərazidə yamacın tam yuxarı hissəsində süxurun ləğv edilməsi istiqamətində işlər aparırlar.