İspaniya superkubokunda 2-ci finalçı məlum oldu

İspaniya Superkubokunda 2-ci finalçının adına aydınlıq gəlib. Səudiyyə Ərəbistanının paytaxtı Ər-Riyad şəhərində keçirilən yarımfinal görüşündə “Betis” və “Barselona” klubları qarşılaşıb.

Matçda hesabı 40-cı dəqiqədə Robert Levandovski açıb. 77-ci dəqiqədə Nabil Fekir tarazlığı bərpa edib: 1-1. Əsas vaxt bu hesabla yekunlaşıb. Əlavə 30 dəqiqədə də tərəflər hərəyə bir dəfə fərqlənib. “Barsa”dan Fatinin qoluna “Betis” Moronun topu ilə cavab verib: 2-2.

Belə olan halda qalibi müəyyənləşdirmək üçün penaltilər seriyasına ehtiyac yaranıb. Burada isə kataloniyalıların zərbələri daha dəqiq olub. 11 metrlik zərbələrdə 4-2 hesabı ilə güclü olan “Barselona” superkubokun finalında “Real Madrid”ə rəqib olub.

İngiltərə Premyer Liqasında 7-ci turdan təxirə salınan oyun keçirilib. "Fulhem" və "Çelsi" arasında London derbisində azarkeşlər 3 qol görüblər. İlk hissə Villianın topu sayəsində meydan sahiblərinin minimal üstünlüyü ilə yekunlaşıb. 47-ci dəqiqədə Kalidu Kulibali hesabı bərabərləşdirib: 1-1.

58-ci dəqiqədə “zadəganlar” azlıqda qalıb. Komandaya yeni qoşulan Joao Feliş debüt matçında birbaşa qırmızı vərəqə ilə cəzalandırılıb. Bundan sonra təzyiqi artıran yerli komanda 73-cü dəqiqədə qələbə topunu vurub. Karlos Vinisius oyunda son nöqtəni qoyub. Fulhem-Çelsi: 2-1.

Bu nəticədən sonra “Fulhem” 31 xalla 6-cı pillədə qərarlaşıb. Çempionatdakı son 9 matçında 5-ci dəfə uduzan “Çelsi” isə 25 xalla 10-cu yerdədir.