Bakıda beynəlxalq konfrans | Bütün dünya hansı problemlə üz-üzədir?

İqlim dəyişikliyi mövzusu getdikcə daha geniş miqyasda və təxirəsalınmaz bir şəkildə beynəlxalq gündəmdə yer almaqdadır. Çünki bu, yalnız bir ölkənin deyil, bütün dünya ölkələrinin üzləşdiyi bir problemdir.

Bunu İqtisadiyyat Nazirliyi yanında Dövlət Vergi Xidmətinin sədri Orxan Nəzərli rəhbərlik etdiyi qurumun təşkilatçılığı ilə Bakıda keçirilən karbon qiymətləndirilməsi üzrə beynəlxalq konfransda bildirib.

"İqlim dəyişikliyi milli sərhədləri aşan qlobal çağırışdır. Bu, gələcək risk deyil, real, indiki vəziyyətdir. Tədbir görülməzsə, düşündüyümüzdən daha ciddi fəsadlara səbəb ola biləcək məsələdir. İqlim dəyişikliyi bəşəriyyət üçün ən dəyərli məfhum olan insan sağlamlığını təhdid edən qlobal təhlükədir.

Bu səbəbdən BMT-nin İqlim Dəyişmələri üzrə Çərçivə Konvensiyasının Tərəflər Konfransı qlobal səviyyədə iqlim dəyişikliyi ilə mübarizədə aparılan ən əhəmiyyətli funksiyaları daşıyır. Bu platforma vasitəsilə qəbul edilən qərarlar dünya ölkələrinin iqlim dəyişikliyinə qarşı daha effektiv mübarizə aparmasına və dayanıqlı inkişafın təmin olunmasına şərait yaradır", – deyə o qeyd edib.