Fiber-optik infrastrukturun modernləşdirilməsinə nə qədər vəsait cəlb edilib? - Baku TV

"SOCAR Fiber" Türkiyədə fiber-optik infrastrukturun modernləşdirilməsinə 10 milyon dollar cəlb edib.

Bu barədə "SOCAR Türkiyə Enerji" məlumat yayıb.

Qeyd olunub ki, Azərbaycan Dövlət Neft Şirkətinin (SOCAR) Türkiyədəki törəməsi olan "SOCAR Türkiyə Enerji"nin tərkibinə daxil olan "SOCAR Fiber" şirkəti fiber-optik infrastrukturun modernləşdirilməsinə investisiyalarını genişləndirir. Bu genişlənmə Türkiyə Sənaye İnkişaf Bankının şirkətə təqdim etdiyi 10 milyon ABŞ dolları məbləğində kredit hesabına həyata keçiriləcək.

Məlumata görə, kredit Asiya İnfrastruktur İnvestisiya Bankının "TSKB – Dayanıqlı energetika və infrastruktur, 3-cü faza" layihəsi çərçivəsində 4 illik müddətə verilir.

Şirkətdən bildirilib ki, bu maliyyələşdirmə sayəsində "SOCAR Fiber" Türkiyəni şərqdən qərbə birləşdirən öz fiber-optik şəbəkəsini daha dayanıqlı və müasir texnologiyalarla uyğunlaşdırılmış hala gətirəcək.

Qeyd edək ki, 2013-cü ildə yaradılan "SOCAR Fiber" artan IP-trafik və yüksək sürətli internet tələbatını ödəmək məqsədi daşıyır. Şirkət 20 şəhər və 67 rayonda xidmət göstərir, Türkiyəni şərqdən qərbə keçən 1850 km uzunluğunda fiber-optik xətt çəkir.