SOCAR-ın Türkiyə ilə bağlı əsas planları nələrdir? | Detallar açıqlandı

“SOCAR Türkiyə” şirkəti Türkiyənin neft-kimya kompleksinə əlavə 7 milyard ABŞ dolları sərmayə qoymağı planlaşdırır.

Bu barədə Türkiyə mətbuatı bu ölkənin vitse-prezidenti Cevdet Yılmaza istinadən məlumat yayıb.

O bildirib ki, bu cür təşəbbüslər xarici ticarət kəsirinin azaldılması və ölkəmizin makroiqtisadi sabitliyinin təmin edilməsi baxımından mühüm əhəmiyyət kəsb edir.

Cevdet Yılmaz xatırladıb ki, SOCAR-ın Türkiyəyə investisiyalarının həcmi 18 milyard ABŞ dollarından çoxdur. Bu baxımdan şirkət Türkiyə iqtisadiyyatına ən çox sərmayə qoyan xarici investordur.

Türkiyənin vitse-prezidenti eyni zamanda Bakı-Tbilisi-Ceyhan, Bakı-Tbilisi-Ərzurum və Trans-Anadolu kimi layihələrin əhəmiyyətini vurğulayıb.

Vitse-prezident həmçinin diqqətə çatdırıb ki, “SOCAR Türkiyə”nin reallaşdırdığı layihələr Türkiyə hökumətinin 2053-cü ilə qədər atmosferə buraxılan zərərli qaz emissiyalarını sıfıra endirmək planlarına uyğundur.