Şuşa-Xankəndi-Laçın yolundan istifadə edənlərə şad xəbər | Sürücülər təəssüratlarını bölüşdü

Şuşa şəhərində SOCAR brendli ilk stasionar yanacaqdoldurma stansiyası istifadəyə verilib.

Yeni yanacaqdoldurma stansiyasının açılış mərasimində “SOCAR Petroleum”un rəhbər heyəti və qonaqlar iştirak ediblər.

Sürücülərin ən çox istifadə etdiyi yollardan olan Şuşa-Xankəndi-Laçın yolunda fəaliyyətə başlayan yeni YDS-də 3 yanacaqpaylayıcı kalonka quraşdırılıb. Burada “Aİ-92”, “Aİ-95” Premium, “Aİ-98” Super və “Dizel” markalı yanacaq məhsullarının satışı həyata keçirilir.

Eyni zamanda elektormobillər də nəzərə alınaraq stansiyada enerji doldurma məntəqəsi də istismara verilib. YDS nağdsız satış üçün POS-terminallarla təchiz edilib.

Qeyd edək ki, ölkəmizdə məşğulluq səviyyəsinin artırılması və əhalinin sosial rifahının yaxşılaşdırılması siyasətinə uyğun olaraq, yanacaqdoldurma stansiyasının açılması ilə bərabər, 26 yeni iş yeri yaradılıb.