ADSEA sədri yağışın fəsadlarının aradan qaldırılması üçün görülən işlərdən danışdı - Baku TV

“Bakı və Abşeron yarımadasında illik yağıntı norması 235 millimetrdir. Yəni bu, təxminən hər kvadratmetrə 235 litr su deməkdir və bu miqdar adətən 12 ay ərzində düşür”.

Azərbaycan Dövlət Su Ehtiyatları Agentliyinin (ADSEA) sədri Zaur Mikayılov “Report” İnformasiya Agentliyinə son günlər paytaxt və ətraf ərazilərə normadan dəfələrlə artıq yağan yağışların yaratdığı fəsadlar barədə danışıb.

Qurum rəsmisi bildirib ki, təkcə martın 27-si və 28-də – iki gün ərzində yağan yağışın miqdarı Ekologiya və Təbii Sərvətlər Nazirliyinin Hidrometeorologiya Xidmətinin məlumatına görə, 143 millimetr təşkil edib:

“Bu rəqəm quru statistika kimi görünə bilər, amma müqayisə üçün deyim ki, bu, illik yağıntı normasının təxminən 60 %-i deməkdir. Yəni Bakı və Abşeron yarımadası üzrə uzunmüddətli müşahidələrə əsasən, 7 ayda yağan yağış cəmi 2 gün ərzində yağıb. Bu, həqiqətən də, çox böyük göstəricidir və hətta fövqəladə vəziyyət kimi qiymətləndirilə bilər. Təbii ki, bu qədər intensiv yağıntı mövcud infrastruktur sistemi, həmçinin çökəklikdə yerləşən ərazilər səbəbindən Abşeronun bəzi bölgələrində geniş subasmaları və daşqınlara səbəb olub”.