Bazarda ağac və tinglərin qiyməti əl yandırır? - "Bunlar bahadır, çünki..." - Baku TV

Son dövrlərdə bazarlarda zeytun, badam və digər meyvə ağaclarının tinglərinə maraq artıb. Lakin vətəndaşlar qiymətlərin əvvəlki illərlə müqayisədə bahalaşdığını bildirirlər.

“İstər meyvə ağacları olsun, istər güllər olsun, qiymətlər çox bahadır”, – sakinlərdən biri bildirib.

Başqa bir sakin isə qeyd edib ki, qiymətlər daha münasib olarsa, yaşıllaşdırmaya maraq daha da artar: “Daha münasib olsa, hamı alar, istifadə edər. Qiymətlər baha olanda bir az geri çəkilirəm, almıram, çünki büdcəmə uyğun olmur”.

Gül bazarlarında aparılan müşahidələr zamanı bəzi tinglərin münasib qiymətə təklif olunduğu, iri və yetişmiş ağacların isə xeyli baha satıldığı məlum olub.

Satıcıların sözlərinə görə, tinglərin qiyməti 3 manat 50 qəpikdən başlayır və növünə, keyfiyyətinə görə dəyişir. Amma ağacın yaşına görə qiymət də artır. Belə ki, artıq yetişmiş, meyvə verən zeytun ağaclarının qiyməti 50 min manatdan başlayır.

Mərkəzi Nəbatat Bağının Oduncaqlı bitkilər laboratoriyasının müdiri Asif Mehrəliyev bildirir ki, tinglərin qiyməti əsasən növündən, yaşından və çıxarılma üsulundan asılıdır. Onun sözlərinə görə, iki yaşdan yuxarı tinglər daha baha satılır. Əgər bitki torpaqla birlikdə, yəni kök sistemi qorunaraq çıxarılıbsa, onun qiyməti daha yüksək olur.

Asif Mehrəliyev qeyd edib ki, nadir tapılan bitkilər – xartut, zoğal, keyfiyyətli və kağız qabıq badam növləri həmişə baha olub. Bunun səbəbi həmin bitkilərin az tapılması, çoxaldılmasının və yetişdirilməsinin çətin olmasıdır.

Ekspertlər tövsiyə edirlər ki, alıcılar yalnız qiymətə deyil, tingin keyfiyyətinə və iqlimə uyğunluğuna da diqqət yetirsinlər. Əks halda, baha alınan ting gözlənilən nəticəni verməyə bilər.