Üzdəki piqment ləkələrinin gözlənilməz səbəbi

"Üz dərisində piqment ləkələrinin yaranmasının səbəbi təkcə günəş şüaları deyil, həm də qacet ekranlarından yayılan mavi işıq ola bilər. Bu işıq dəriyə daha dərin nüfuz edərək hüceyrələrin fəaliyyətini pozur".

Bu barədə rusiyalı dermatoloq Rina Urazayeva bildirib.

Həkim izah edib ki, dəri rənginə melanin adlı piqment cavabdehdir və onu melanosit adlanan hüceyrələr istehsal edir. Bu hüceyrələrin fəaliyyəti pozulduqda, dəridə əsas tondan daha tünd və ya daha açıq sahələr yaranır.

Piqment ləkələrinin yaranmasına çox vaxt ultrabənövşəyi şüaların həddindən artıq təsiri səbəb olur. Bu isə melaninin artmasına gətirib çıxarır.

"Biz adətən günəşi günahlandırırıq, amma onun bir "köməkçisi" də var – yüksək enerjili görünən işıq, yəni mavi işıq. Bu işıq smartfon, planşet ekranları və LED lampalar tərəfindən yayılır. Yüksək enerjili görünən işıq şüalanması ultrabənövşəyi şüalardan daha dərinə nüfuz edir və melanin istehsalını aktivləşdirir. Onun yaratdığı piqmentasiya üç aya qədər qala bilər", – deyə Rina Urazayeva bildirib.

"Dərini qorumaq üçün tərkibində dəmir oksidləri olan tonlaşdırıcı vasitələrdən istifadə etmək lazımdır. Onlar mavi işığı fiziki olaraq bloklayır. Həmçinin gecə saatlarında qacetlərdən uzaq qalmaq və hər gün qoruyucu krem tətbiq etmək vacibdir", – deyə dermatoloq vurğulayıb.

Həkim həmçinin bildirib ki, əgər piqment ləkəsi böyüyərsə, asimmetrik olarsa, rəngi dəyişərsə və ya kənarları qeyri-bərabər olarsa, dərhal həkimə müraciət etmək lazımdır.