“Gör nə günə qoyublar” | Pivə zavodu ilə bağlı qalmaqal | "Bütün kanalizasiyanın suyu..." - Baku TV

Sosial şəbəkələrdə Xətai rayonunda yerləşən “Alko” pivə zavodu tərəfindən dənizə çirkab suların axıdılması ilə bağlı videogörüntülər yayılıb.

Baku TV məsələni araşdırmaq üçün sözügedən ünvanda olub.

“Zavod bir ildən çoxdur fəaliyyət göstərmir. Heç bir su axıdılmır. Deyirlər ki, guya canlılar ölür. Burada heç bir canlı ölməyib. Bu, yalan məlumatdır”, – zavodun mühafizəçisi bildirib.

Sakinlərdən biri isə ərazidə kanalizasiya sisteminin olmadığını deyib.

“Kanalizasiya sistemi yoxdur məhəllədə. Bütün tikililərin kanalizasiya suları oraya axır”, – sakin qeyd edib.

Məsələ ilə bağlı “Alko LMD Azər Spirt 2024” Məhdud Məsuliyyətli Cəmiyyətinin açıqlamasında bildirilib ki, müəssisənin ətrafında müşahidə olunan çirkab suların zavodun fəaliyyəti ilə hər hansı əlaqəsi yoxdur.

Qeyd olunub ki, müəssisə uzun illər ərzində spirtli içkilərin istehsalı ilə məşğul olsa da, fəaliyyəti dövründə kimyəvi qatqılar tərkibli təhlükəli tullantıların axıdılmasından söhbət gedə bilməz.