Müharibələr bəşəriyyətə nə verdi? - Haqq-ədalət uğrunda mübarizə necə olmalıdır? - AMİN

“Amin” verilişinin yeni buraxılışında tarix üzrə fəlsəfə doktoru Rəşad Mustafa ilə müharibə mövzusu müzakirə olunub.

O, dövlətin öz sərhədlərini qorumasını ən ali və ədalətli hüquq kimi qiymətləndirib:

“Bir dövlətin öz sərhədlərini müdafiə etməsindən daha ədalətli müharibə ola bilməz. Bu bizim ən təməl haqqımızdır. Müasir dünyada insanın yaşama, mülkiyyət və vicdan azadlığı kimi fundamental hüquqlarından bəhs edilir. Lakin unudulmamalıdır ki, əgər kimsə mənim torpağımı zəbt edirsə, bütün bu azadlıqlar avtomatik olaraq pozulur. İşğal faktı, ilk növbədə, insanın yaşama hüququna qəsddir, eyni zamanda onun əmlak və iqtisadi azadlıqlarının məhv edilməsidir”.

Rəşad Mustafa müharibənin qaçınılmazlığını və dövlətin bu prosesdəki rolunu belə izah edib:

“Müharibəyə görə insan öldürməyə dəyərmi?” deyənlər öz evlərinin bir otağı zəbt edilərsə, buna səssiz qala bilməzlər. Dövlət və ictimai birlik məhz bu hüquqları qorumaq üçün mövcuddur. Biz bu birlik sayəsində 44 günlük Vətən müharibəsində minimum itki ilə böyük bir tarixi nəticəyə imza atdıq”.