Özünü apara bilməyən veriliş aparır | Seyran Səxavət kimləri topa tutdu? - AMİN

“Amin” verilişinin yeni buraxılışı yayımlanıb. Proqramın budəfəki buraxılışında ziyalı yükü mövzusunda yazıçı, şair Seyran Səxavətlə müzakirə aparılıb.

Hazırkı dövrdə ziyalı olmağın sərf etmədiyini söyləyən şair onun yükünün ağır olduğunu vurğulayıb:

“Bizdə milli şüur sıfırdan bir az aşağıdır. Onu tənzimləyən təhsildir. Təhsil özü isə yaxşı vəziyyətdə deyil. Bizdə əvvəllər sovet təhsil sistemi mövcud idi. Müstəqillikdən sonra yeni təhsil sistemi yaratmamış onu darmadağın etdik”.

S.Səxavət qeyd edib ki, ziyalı problemi ilə bağlı bəlaların başında savadsızlıq və milli şüurun aşağı olması dayanır.

“Televiziya aparıcılarının əksəriyyəti özünü apara bilmir. Çünki onlar kitab oxumurlar. Azərbaycan dili reanimasiya vəziyyətindədir. Televiziya məkanı isə bunun bir nömrəli səbəbkarıdır”, – o deyib.

Yas mərasimlərində islamın təbliğinin düzgün aparılmaması məsələsinə də toxunan yazıçı “mollalar yaslarda naftalin iyi verən məntiqləri ilə bilib-bilmədiklərini danışırlar”, – deyə sözlərinə əlavə edib.