Şirvanda 14 saylı məktəb bağlanır?

Şirvan rayonunda yerləşən şəhid Milli Qəhrəman Rafael Həbibov adına 14 saylı tam orta məktəbin bağlanacağı barədə məlumat yayılıb.

Valideynlər iddia edirlər ki, bir neçə gündür məktəbəqədər hazırlıq qruplarına və 1-ci sinfə onlayn qəbul dayandırılıb. Onların sözlərinə görə, təhsil ocağının bağlanmasına səbəb kimi şagird sayının az olması göstərilir.

Məsələ ilə bağlı Şirvan-Salyan Regional Təhsil İdarəsinin əməkdaşı Gülay Qambayzadə bildirib ki, iddialar əsassızdır, sözügedən məktəbdə tədris davam edir.

Qeyd edək ki, 300 nəfərə yaxın şagirdin təhsil aldığı 14 saylı məktəb beynəlmiləl məktəb hesab olunur və Şirvan şəhərində rus və Azərbaycan dilində təhsil verən 2 təhsil ocağından biridir.