"Şükürlər olsun ki, övladım burada oxuyur" | Bilik Günü Laçında coşqu ilə qeyd olunur - Baku TV

Artıq dördüncü ildir ki, Laçında Bilik Günü böyük sevinc hissi ilə qeyd olunur. Vaxtilə işğal altında olan bu ərazilərdə indi uşaqların təhsil alması Böyük Qayıdışın ən gözəl mənzərələrindən biri hesab olunur.

Laçın sakinləri bu əlamətdar günlə bağlı təəssüratlarını Baku TV ilə bölüşüblər.

“Özüm Laçında doğulmasam da, övladım artıq burada 1-ci sinfə gedir. Şükürlər olsun ki, o, valideynlərimin oxuduğu məktəbdə təhsil alacaq”, – sakinlərdən biri söyləyib.

Digər bir vətəndaş isə vurğulayıb:

“Ədalət Məmmədov adına Zabux kənd tam orta məktəbi atamın adını daşıyır. Bu il övladım həmin məktəbdə 1-ci sinfə qədəm qoydu. Buna görə çox sevinirik. Əminəm ki, şəhid atamın da ruhu şaddır, çünki nəvələri artıq onun adını daşıyan məktəbdə təhsil alırlar”.