ABŞ XTQ-si xüsusi əməliyyat keçirib

İslam İnqilabı Keşikçiləri Korpusu İran səmasında daha bir "MQ-9" hərbi pilotsuz uçuş aparatını vurub.

Bu barədə "Fars" informasiya agentliyi məlumat yayıb.

Bildirilir ki, PUA İsfahan əyaləti üzərində zərərsizləşdirilib. Pilotsuz təyyarənin hansı ölkəyə məxsus olduğu açıqlanmayıb.

Bu arada ABŞ Prezidenti Donald Tramp İran səmasında vurulan Amerikanın "F-15" qırıcı təyyarəsinin ikinci heyət üzvünün xilas edilməsini təsdiqləyib. O bu barədə "Truth Social"da paylaşım edib.

"Yaralandı, amma hər şey yaxşı olacaq. Biz ona çatdıq! Mən sizə onun sağ və sağlam olduğunu bildirməkdən çox məmnunam", – deyə Tramp vurğulayıb.

Onun sözlərinə görə, ABŞ hərbçiləri pilotu təxliyə etmək üçün ən cəsarətli axtarış-xilasetmə əməliyyatlarından birini həyata keçirib.