Konqoda Ebola virusundan ölənlərin sayı daha da artdı

Konqoda Ebola virusundan ölənlərin sayı 131 nəfərə çatıb.

Ölkənin səhiyyə nazirinin açıqlamasına əsasən, ümumilikdə 513 nəfərin virusa yoluxduğu ehtimal olunur.

Ümumdünya Səhiyyə Təşkilatı vəziyyətlə əlaqədar Konqo və Uqandada beynəlxalq əhəmiyyətli fövqəladə vəziyyət elan edib.

Təşkilatın Baş direktoru Tedros Adhanom Qebreyesus epidemiyanın miqyası və yayılma sürətindən ciddi şəkildə narahat olduğunu bildirib, epidemiyanın uzun müddət davam edə biləcəyi barədə xəbərdarlıq edib.

ÜST həmçinin əvvəlki epidemiyanın iki il davam etdiyini xatırladıb.

“Bu epidemiyanın iki ay ərzində bitəcəyini düşünmürük. Epidemiyanın miqyası bizim reaksiya sürətimizdən, infeksiyanın yayılmasını tez bir zamanda dayandırmaq qabiliyyətimizdən asılı olacaq. Bizim peyvəndimiz yoxdur və buna görə də əhalinin əməkdaşlığına ümid etməliyik”, – deyə Təşkilatın açıqlamasında qeyd olunub.

Bu arada, ABŞ Dövlət Departamenti Konqo və Uqandada Ebolanın yayılmasına qarşı mübarizə aparmaq üçün 13 milyon dollar ayırıb.

Qeyd edək ki, son 50 ildə Ebola virusu Afrikada 15 mindən çox insanın həyatına son qoyub.