Ukraynadan Rusiya tankerinə hücumla bağlı açıqlama

“Ukrayna Rusiyadan Gürcüstana günəbaxan yağı apararkən hücuma məruz qalan “Midvolqa-2” tankeri ilə bağlı hadisədə iştirak etməyib”.

Bunu Ukrayna Xarici İşlər Nazirliyinin sözçüsü Georgi Tixiy sosial şəbəkədə yazıb.

“Ukraynanın bu hadisə ilə heç bir əlaqəsi yoxdur və biz Rusiya təbliğatının irəli sürdüyü hər hansı bir ittihamı rəsmi olaraq təkzib edirik”, – deyə Nazirlik rəsmisi bildirib.

Bundan əlavə, o qeyd edib ki, bütün bu hücumları Rusiya tərəfi özü təşkil edib.

Qeyd edək ki, “Midvolqa-2” tankeri ilə yanaşı, ötən günlərdə Qara dənizin Türkiyə sahillərində sanksiya tətbiq edilmiş iki tanker alovlanıb. Bəzi mənbələr bunu Ukrayna Təhlükəsizlik Xidmətinin xüsusi əməliyyatı adlandırıb.