SOCAR gənc media nümayəndələri üçün sessiya təşkil etdi | Hansı məlumatlar verildi? - Baku TV

İyunun 22-də Enerji Dialoqu Platforması çərçivəsində SOCAR-ın baş ofisində gənc media nümayəndələri üçün növbəti məlumatlandırma sessiyası təşkil olunub.

Əvvəlcə media nümayəndələri Azərbaycan nefti sərgisi ilə tanış olublar.

Vitse-prezidentin müavini, “SOCAR Midstream Qaz Əməliyyatları” şirkətinin icraçı direktoru Polad Rüstəmovun və “Azəriqaz” İstehsalat Birliyinin baş direktoru Azər Məmmədovun iştirakı ilə təşkil olunan sessiyada gənc jurnalistlərə təqdimatlar edilib.

Çıxış zamanı Azərbaycanın enerji ixracı marşrutları infrastrukturu, o cümlədən Cənub Qaz Dəhlizi və onun genişlənmə perspektivləri, həmçinin ölkəmizdə təbii qazın paylanması istiqamətində tətbiq olunan innovativ həllər barədə məlumatlar verilib.

Təşkil olunan digər sessiyada SOCAR prezidentinin müşaviri, şirkətin baş iqtisadçısı Ramin Dənyarovun, Enerji sektorunun təhlili şöbəsinin rəisi Emil Qasımzadənin və iqtisadi təhlil seqmentinin aparıcı iqtisadçısı Ayan Quluzadənin nitqi dinlənilib.

Natiqlər qlobal enerji və iqtisadi proseslər barədə dəqiq və vaxtında məlumatlandırmanın əhəmiyyəti mövzusundan bəhs ediblər.

Sessiyalar çərçivəsində gənc media nümayəndələrini maraqlandıran suallar cavablandırılıb.