Ukraynalı rəsmilər "Baku TV"yə nələri açıqladı? - Baku TV

Son günlər Ukrayna cəbhəsində döyüşlər yenidən intensivləşib. Ölkələrin dərinliklərinə qarşılıqlı zərbələrin nisbətən azaldığı bir vaxtda ön xətdə, demək olar ki, bütün istiqamətlər üzrə hücumların artdığı müşahidə olunur. Rusiya Ordusunun cəbhəboyu aktivliyinin artması fonunda Ukrayna tərəfinin də əks-hücum əməliyyatları genişlənir. Xüsusilə ötən il Donetsk vilayətindən irəliləyərək Dnepropetrovsk vilayətinə daxil olan Rusiya qüvvələrinə qarşı Ukrayna Ordusu təzyiqi artırıb.

Ukrayna Silahlı Qüvvələri Baş Qərargahının sözçüsü Andrey Kovalyov bildirib ki, Ukrayna Silahlı Qüvvələri faktiki olaraq 1200 kilometr uzunluğunda cəbhədə Rusiya Ordusuna qarşı aktiv müqavimət göstərir:

“Bundan başqa, Rusiya Federasiyası, Belarus Respublikası və Moldovanın Rusiya qoşunları tərəfindən zəbt edilmiş hissəsi ilə dövlət sərhədi də nəzarətdə saxlanılır. Faktiki olaraq 2026-cı ilin yanvar ayının sonundan Ukrayna Silahlı Qüvvələrinin Aleksandriya istiqamətində aktiv əməliyyatları davam edir. Bura Donetsk ərazisidir və Dnepropetrovsk vilayəti ilə sərhəddə yerləşir. Məqsəd düşməni bu vilayətin inzibati sərhədlərindən kənara sıxışdırmaqdır. Xüsusilə yanvarın sonundan aprelin əvvəlinə qədər artıq 480 kvadratkilometrdən çox ərazi azad edilib. Bu ərazilərə Dnepropetrovsk vilayətində 8, Zaporojye vilayətində isə 4 yaşayış məntəqəsi daxildir”.