Alban hökmdarları "Xaqan" adlanırdı, Sovet tarixçiləri "çar" sözü ilə əvəzləyib

“Qərbi Azərbaycan Xronikası” layihəsi çərçivəsində “Atropatenanın ərazisi təkcə Güneyi yox, Qara dənizə qədər ərazini əhatə edirdi” adlı veriliş efirə gedib.

Verilişdə tarixçi alim Ramin Əlizadə Atropatena və Alban dövlətlərinin yaranma tarixindən söz açır.

Bildirilir ki, albanların Kür çayının sağ sahilində, hələ eradan əvvəl 8-ci əsrin ortalarında yaşadığını, eləcə də eradan əvvəl 743-cü ildə tayfa ittifaqı formalaşdırıb Qərbi Azərbaycan ərazisində yaşadığını sübut edən tutarlı dəlil mövcuddur.

Onun sözlərinə görə, Urartu kitabələri utilərin bir neçə hökmdarının və şəhərinin olmasını, Göyçə gölünün qərbindən ta müasir Qars bölgəsində qədər, Ağbaba, Şörəyel, Dərəçiçək mahalları, hətta Çıldır gölünə qədər böyük bir coğrafiyanı əhatə etdiyini təsdiqləyir.

R.Əlizadə deyib ki, Azərbaycan ərazisində Albaniya, Atropatena məhz saqların, iskitlərin qədim dövlətçilik ənənəsinə əsaslanıb:

“Erməni keşişləri orta əsrlər dövründə Alban tarixi əsərinə ermənilər haqqında uydurma rəvayətlər daxil edirdilər ki, erməni xalqı ilə alban xalqının tarixin eyniləşdirsinlər, bunların bir kökdən olduğunu əsaslandırsınlar. Əlbəttə, bu cəfəngiyyatı hələ 70 il bundan öncə sovet dövründə yaşamış albanşünas Trever müəyyən etmişdi.

Bundan sonra aparılan tədqiqatlarda, şübhəsiz ki, erməni və alban mədəniyyətlərinin tamam bir-birinə yad mədəniyyət olduğu, hətta xristianlığı albanların ermənilərdən 270 il əvvəl qəbul etməsi “Alban tarixi” əsərində qeyd olunur”.