Almaniya XİN-dən İranın qərarına sərt etiraz | Tehrana qarşı sanksiyalar sərtləşdirilir?

Dünyanın əksər ölkələrində insan hüquqlarına zidd olduğu əsas gətirilərək ölüm hökmü ləğv olunsa da, ən ağır cinayətlərə görə müəyyən ölkələrdə hələ də bu cəza növü qalmaqdadır.

Hazırda bu cəza növünün tətbiqi ilə ölüm halları baxımından qonşumuz İran dünyada liderdir.

Bu günlərdə qonşu ölkədə daha bir qalmaqallı ölüm hökmü icra olunub. 2020-ci ildə Dubayda İran Təhlükəsizlik Qüvvələri tərəfindən oğurlandığı iddia edilən və ikili vətəndaşlığı olan 69 yaşlı əslən iranlı Almaniya vətəndaşı Cəmşid Şarməhd İran məhkəməsinin qərarı ilə terrorizm ittihamı ilə edam edilib.

Almaniyanın xarici işlər naziri Annalena Berbok həmin qərara etirazını belə ifadə edib:

“Cənab Cəmşid Şarməhdin qətli İranın ədalətsiz rejiminin dəhşətli amansızlığını bir daha göstərir. Biz dəfələrlə və birmənalı şəkildə İrana bildirmişik ki, Almaniya vətəndaşının edam edilməsi ciddi nəticələrə səbəb olacaq. Buna görə də mən Frankfurt-Maynda, Münhen və Hamburqda İranın üç baş konsulluğunu bağlamaq qərarına gəldim. İranın yeni hökuməti özü dəfələrlə iddia edib ki, o, Qərblə əlaqələr qurmaq istəyir. İran bunun üçün hansı konkret addımların atılmalı olduğunu bilir”.

Almaniyanın xarici işlər naziri bildirib ki, ölkəsi İranın Avropada möhkəmlənməsini çətinləşdirən növbəti sanksiyalar paketini qəbul edib.

Nazir onu da əlavə edib ki, İranın İnqilab Keşikçiləri Korpusunun Brüsseldə terror təşkilatları siyahısına salınmasına çalışır və Düsseldorf Ali Regional Məhkəməsinin qərarı bunun üçün hüquqi şərait yaradacaq.

İki ölkə arasında diplomatik münasibətlərə toxunan A.Berbok bu əlaqələrin çox aşağı səviyyədə olduğunu ifadə edib. İndi sual olunur, belə kritik vəziyyətdə İran Qərblə münasibətlərini necə bərpa edəcək? İranda yeni prezidentin hakimiyyətə gəlməsi ilə Qərblə münasibətlərdə yeni səhifə açılmasının mümkünlüyü düşünüldüyü bir vaxtda bu səhifə açılmadan qapanırmı?